ສີລະປະການໃຊ້ຊີວິດ/ Art of life

Credit: Visual Art

ຄົນເຮົາກໍ່ຄືສິ່ງທີ່ມີຊີວິດຊະນິດໜຶ່ງ ຖ້າທຽບໃສ່ສິ່ງທີ່ມີຊີວິດຊະນິດອື່ນແລ້ວ ເຮົາຈະມີຄວາມໄດ້ປຽບຫຼາຍຍ້ອນວ່າ ເຮົາມີສະໜອງ, ມີຫົວຄິດ ແລະ ທີ່ສໍາຄັນ ມີສະຕິທີ່ໂດດເດັ່ນ ສາມາດຄວບຄຸມຕົນເອງໄດ້ ເຊິ່ງແຕກຕ່າງຈາກສິ່ງທີ່ມີຊີວິດ ຊະນິດອື່ນ.

 ຄົນເຮົາເປັນສັດທີ່ໄດ້ປຽບທາງດ້ານມັນສະໜອງ, ເປັນຫຍັງຈຶງເວົ້າວ່າເຮົາໄດ້ປຽບທາງດ້ານມັນສະໜອງ? 

ເພາະວ່າຖ້າເຮົາຢາກຮູ້ຫຍັງ ເຮົາກໍ່ຈະຄົ້ນຫາຄໍາຕອບ ແລະ ໃນທີ່ສຸດ ກໍ່ຈະສາມາດຊອກຫາຄໍາຕອບໄດ້. ຕົວຢ່າງເຊັ່ນ: ຄົນເຮົາບໍ່ແມ່ນນົກ ແຕ່ສາມາດບິນໄດ້ກາງເວຫາໂດຍອາໄສເຄື່ອງບິນທີ່ປະດິດຄິດຄົ້ນຈາກມັນສະໜອງ. ຄົນເຮົາບໍ່ແມ່ນສັດນໍ້າ  ແຕ່ເຮົາສາມາດປະດິດເຄື່ອງຊ່ວຍຫາຍໃຈໃນນໍ້າໄດ້ ຫຼື ສາມາດເດີນທາງໄປໄກແສນໄກ ໂດຍຜ່ານທາງນໍ້າໄດ້ ແລະ ຍັງມີເລື່ອງໜ້າອັດສະຈັນອື່ນໆອີກຫຼາຍຢ່າງ. 

ຍ້ອນເຮົາເປັນສັດສັງຄົມທີ່ສາມາດດໍາລົງຊີວິດ ຮ່ວມກັນ ໂດຍທີ່ແຕ່ລະຄົນມີຄວາມສາມາດ ຫຼື ພອນສະຫວັນສະເພາະຂອງໃຜມັນ, ໝາກຜົນຂອງຄວາມຮູ້ທີ່ມາຈາກແຕ່ລະບຸກຄົນ ມາລວມຕົວເຂົ້າກັນ ເຮັດໃຫ້ສັງຄົມເຮົາມີຄວາມກ້າວໜ້າໄປເທື່ອລະກ້າວ ແລະ ການດໍາລົງຊີວິດຂອງຄົນສ່ວນໃຫຍ່ກໍ່ສະດວກຂຶ້ນຖ້າທຽບໃສ່ເມື່ອກ່ອນ. 

ສິ່ງທີ່ຂ້ອຍບັນຍາຍມານັ້ນ ຫຼາຍຄົນກໍອາຈະຮູ້ແລ້ວ. ແຕ່ເຊື່ອບໍ່ວ່າ, ການທີ່ໄດ້ເກີດມາເປັນສັດປະເສີດນັ້ນ ອາດຈະບໍ່ເຮັດໃຫ້ທຸກຄົນມີຄວາມສຸກສະເໜີໄປ. ສົງໃສບໍ່ວ່າຍ້ອນຫຍັງ? ກໍຍ້ອນວ່າເຮົາບໍ່ເຂົ້າໃຈຊີວິດ, ເຮົາບໍ່ເຂົ້າໃຈຕົນເອງ. ເຮົາຮຽນຮູ້ແຕ່ໂລກພາຍນອກ, ແຕ່ເຮົາບໍ່ສຶກສາໂລກທີ່ຢູ່ພາຍໃນຕົວເຮົາເທົ່າທີ່ຄວນ ເຊັ່ນ: ຄວາມຄິດເຮົາ, ພຶດຕິກໍາຂອງເຮົາ, ອາລົມຂອງເຮົາ. ບາງຄົນອາດຕັ້ງຄໍາຖາມວ່າເປັນຫຍັງຂ້ອຍຕ້ອງສຶກສາຕົນເອງ. ນີ້ກໍ່ເພື່ອຈະໄດ້ ເຂົ້າໃຈຕົວເອງຫຼາຍຂຶ້ນ ແລະ ຈະໄດ້ໃຊ້ຊີວິດຢ່າງມີຄວາມສຸກ. 

ເຄີຍບໍ່ທີ່ເຈົ້າປະສົບຜົນສໍາເລັດ ຫຼື ເຮັດສິ່ງໃດໜຶ່ງໄດ້ດີກ່ວາໝູ່ເພືອນຂອງເຈົ້າ, ເຈົ້າພູມໃຈໃນເບື້ອງຕົ້ນ ບວກກັບທີ່ໝູ່ເຈົ້າຍ້ອງຍໍຊົມເຊີຍເຈົ້າ ເຮັດໃຫ້ເຈົ້າມີຄວາມສຸກ. ແຕ່ຫຼັງໆ ຂ່າວຄວາມສໍາເລັດຂອງເຈົ້າຈະຈາງຫາຍໄປ, ຄົນອື່ນບໍ່ຈື່ ຫຼື ຍ້ອງຍໍເຈົ້າອີກ, ອໍານາດບາລະມີຫຼົດນ້ອຍລົງ ແລະ ນີ້ ອາດເປັນສາເຫດທີ່ເຮັດໃຫ້ເຈົ້າທຸກ. ເຄີຍບໍ່ ທີ່ໝູ່ຄົນອື່ນໄດ້ດີ ແລ້ວເຈົ້າສະແດງຄວາມຍິນດີກັບເຂົາ, ແຕ່ເລີກໆລົງໄປ ເຈົ້າພັດຮູ້ສຶກອິດສາ ແລະ ຄວາມຄິດອິດສານີ້ ເຮັດໃຫ້ເຈົ້າເປັນທຸກ. ເຄີຍບໍ່ທີ່ເຈົ້າໝັກຮຽກຮ້ອງຄວາມສົນໃຈຈາກຄົນອື່ນ ອາດຈະເປັນການຮຽກຮ້ອງຕົວ ຕໍ່ ຕົວ ກໍ່ດີ ຫຼື ຮຽກຮ້ອງໂດຍຜ່ານສື່ຕ່າງໆເຊັ່ນ: Facebook, instargams ... ໂດຍກການໂພສຮູບລົງແລ້ວລໍຖ້າໃຫ້ເຂົາເຈົ້າກົດ Like ກົດ share. ຖ້າຄົນອື່ນກົດ Like ກົດ share ໂພສຂອງເຈົ້າ ເຈົ້າດີໃຈບໍ່ ແຕ່ຖ້າເຂົາເຈົ້າບໍ່ເຮັດແນວນັ້ນເດ, ເຈົ້າເປັນທຸກບໍ່? 

ທີ່ຖາມຄໍາຖາມເຫຼົ່ານີ້ຂຶ້ນມາແມ່ນເພື່ອເລົ່າຄືນລັກສະນະຂອງຄົນເຮົາ. ໂດຍອີງຕາມຈິດຕະວິທະຍາແລ້ວ ຄົນສ່ວນໃຫຍ່ເປັນແບບນີ້. ຂ້ອຍເອົາຕົວເອງເປັນກໍລະນີສຶກສາ ເພາະຂ້ອຍຮູ້ວ່າຂ້ອຍຮູ້ຕົວເອງດີທີ່ສຸດ ຖ້າທຽບໃສ່ມະນຸດຄົນອື່ນ. 

ຈາກຄໍາຖາມຂ້າງເທິງນັ້ນ ສາມາດວິເຄາະໄດ້ດັ່ງລຸ່ມນີ້:

1: ຕໍ່ໃຫ້ເຮົາປະສົບຜົນສໍາເລັດຫຼາຍກ່ວາຄົນອື່ນກໍ່ຕາມ, ເຮົາຍັງເປັນທຸກ ຍ້ອນເຮົາເອົາຄວາມສຸກຂອງຕົນເອງ ໄປຜູກມັດໄວ້ກັບຄົນອື່ນ.

2: ຕໍ່ໃຫ້ຄົນອື່ນບໍ່ມາທໍາຮ້າຍເຮົາ, ແຕ່ເຮົາກໍ່ເຈັບ ຍ້ອນເຮົາໄປອິດສາເຂົາເຈົ້າ, ເຮົາເອົາຕົວເອງໄປປຽບທຽບ, ເຮົາເອົາຄວາມສຸກຂອງເຮົາໄປຜູກມັດໄວ້ກັບຄົນອື່ນ.

3: ຄົນອື່ນບໍ່ມາສົນໃຈເຮົາ ຍ້ອນແຕ່ລະຄົນກໍ່ລ້ວນແລ້ວແຕ່ຕ້ອງການໃຫ້ຄົນອື່ນມາສົນໃຈຕົວເອງ ແລ້ວເຮົາກໍ່ເປັນທຸກ ເພາະວ່າເຮົາບໍ່ເຂົ້າໃຈຄວາມຈິງຂອງຊີວິດຄົນ ເຮົາຢາກໃຫ້ຄົນອື່ນມາສົນໃຈເຮົາໃນຂະນະທີ່ຄົນອື່ນກໍ່ຢາກໃຫ້ເຮົາໄປສົນໃຈເຂົາເຈົ້າກ່ອນ.

ຈາກການວິເຄາະເຫັນວ່າ, ໂອກາດທີ່ຄົນເຮົາຈະເປັນທຸກນັ້ນມີຫຼາຍທີ່ສຸດ ບໍ່ວ່າຄົນຜູ້ໜຶ່ງຈະປະສົບຜົນສໍາເລັດ ຫຼື ລົ້ມແລວ ຖ້າຄົນໆນັ້ນ ບໍ່ເຈົ້າໃຈກົດແຫ່ງຊີວິດ. ແລ້ວເຮົາຈະໃຫ້ຕົນເອງພົ້ນອອກຈາກວົງຈອນຄວາມທຸກຄືແນວໃດ? 

ຄໍາຕອບງ່າຍໆ, ເຮົາກໍ່ຢ່າງອອກມາຈາກວົງຈອນນັ້ນຕິ ໂດຍການທອດລະຫັດຂອງຊີວິດ. ການຖອດລະຫັດຊີວິດແມ່ນຫຍັງ? ແມ່ນການເອົາຈິດຂອງເຮົາ ອອກຈາກຕົວເຮົາ ເພື່ອຈະມາສັງເກດເບິ່ງຕົນເອງ. ງົງບໍ່ທີ່ເຈົ້າຈະທອດລະຫັດຂອງ ຕົວເອງ? ການຖອດລະຫັດຈະຊ່ວຍໃຫ້ເຈົ້າເຂົ້າໃຈຕົວເອງ ແລະ ເຂົ້າໃຈຄົນອື່ນ, ເຈົ້າຈະບໍ່ເປັນຜູ້ຮັບ (ຄວາມເຈັບປວດ ຫຼື ຄວາມສຸກ), ແຕ່ກົງກັນຂ້າມ ເຈົ້າຈະກາຍມາເປັນຜູ້ສັງເກດ ແລະ ສຶກສາຕົວເອງ ແລະ ມັນຈະເຮັດໃຫ້ເຈົ້າບໍ່ມີປະຕິກິລິຍາຕໍ່ສິ່ງທີ່ເກີດຂຶ້ນ, ເຈົ້າຈະໜີອອກຈາກອາລົມທຸກ- ສຸກຂອງຕົນເອງ. ວິທີການຖອດລະຫັດຕົວເອງໃຫ້ເຈົ້າລອງຈິນຕະນາການ (3 ນາທີ) ວ່າເຈົ້າແຍກຈິດ ອອກຈາກຕົວເຈົ້າ ແລະ ດຽວນີ້ ຈິດຂອງເຈົ້າກໍາລັງສັງເກດ ຕົວເຈົ້າເອງຢູ່. ເຈົ້າເຫັນຕົວເຈົ້າບໍ່? ຖ້າເຈົ້າສາມາດຈິນຕະນາການໃນຂະນະນີ້ວ່າເຈົ້າກໍາລັງເຮັດຫຍັງຢູ່ ກໍ່ໝາຍຄວາມ ວ່າເຈົ້າສາມາດທອດລະຫັດຕົວເອງ ໄດ້ແລ້ວ. 

ບັດນີ້ ເຮົາມາດັບທຸກດ້ວຍການທອດລະຫັດກັນເທາະ. ຖ້າເຈົ້າຮູ້ສຶກອິດສາ: ໃຫ້ເຈົ້າທອດລະຫັດແລ້ວລົມກັບໂຕເອງວ່າ ຄົນເຮົານີ້ໝັກອິດສາຄົນອື່ນນໍ້. ຖ້າເຈົ້າກໍາລັງທຸກ ຍ້ອນສາເຫດອັນໃດອັນໜຶ່ງ: ໃຫ້ເຈົ້າທອດລະຫັດແລ້ວເບິ່ງຕົວວ່າ ຄົນເຮົານີ້ໝັກທຸກນໍ້. ສາເຫດທີ່ ບໍ່ສົມປອງ ມີຄວາມທຸກແມ່ນຍ້ອນຫຍັງ? ບໍ່ມີແຟນ, ບໍ່ມີເງິນ, ວ່າງງານ, ຄົນອື່ນບໍ່ສົນໃຈ.... ແລ້ວກໍ່ສຶກສາຮາກເຫງົ້າ ລົງໄປອີດວ່າ ເປັນຍ້ອນ... 

ຖ້າເຈົ້າໄດ້ Iphone 10 ແລ້ວຍັງຢາກໄດ້ Iphone 11, Iphone ຫຼ້າສຸດ ອື່ນໆຕໍ່ໄປ ເຊິ່ງເຮັດໃຫ້ເຈົ້າທຸກ: ໃຫ້ເຈົ້າຖອດລະຫັດແລ້ວມາເບິ່ງຕົນເອງວ່າ ເອ້ ຄົນເຮົານີ້ບໍ່ມີເມືອງພໍນໍ້ ແລະ ອາດຈະຫາຄໍາຕອບໃຫ້ຕົນເອງວ່າ ຖ້າເຮົາຢາກດັບທຸກ ເຮົາຕ້ອງຮູ້ຈັກພໍ.ການຖອດລະຫັດຊ່ວຍໃຫ້ເຈົ້າເຂົ້າໃຈຕົວເອງ, ສາມາດເຂົ້າໃຈສາເຫດທີ່ເຮັດໃຫ້ເຮົາທຸກ ເຊິ່ງເທົ່າກັບວ່າເຮົາ ອອກມາເປັນຄົນສັງເກດ ແລະ ບໍ່ຈົບປັກກັບຄວາມທຸກນັ້ນອີກຕໍ່ໄປ. ມັນຄືກັບວ່າ ເຮົາເຫັນຄົນໃດໜຶ່ງລົ້ມ ລົດຖີບແລ້ວເຈັບ ແຕ່ເຮົາບໍ່ເຈັບຍ້ອນວ່າເຮົາເປັນຄົນສັງເກດຢູ່. ໃນເມື່ອຈິດເຈົ້າອອກຈາກຕົວເອງ ແລ້ວກ້າວອອກມາເປັນຜູ້ສັງເກດຕົວເຈົ້າເອງ, ເຈົ້າກໍ່ຈະເຂົ້າໃຈຊີວິດ ແລະ ການທີ່ເຈົ້າເຈົ້າໃຈຊີວິດນັ້ນ ຈະເຮັດໃຫ້ເຈົ້າສາມາດຄວບຄຸມ ແລະ ບັນຊາທິດທາງຊີວິດ ແລະ ອາລົມຂອງເຈົ້າ ໃຫ້ເປັນໄປໃນທິດທາງທີ່ຕົນເອງຕ້ອງການ ບໍ່ວ່າຈະໃຫ້ເປັນທຸກ ຫຼື ສຸກ ແລະ ແນ່ນອນ ຂ້ອຍຈະເລືອກໃຫ້ຕົນເອງເປັນສຸກຢູ່ຕະຫຼອດເວລາ ຍ້ອນວ່າຂ້ອຍມີອໍານາດໃນການຄວບຄຸມອາລົມຂ້ອຍເອງ. ການສຶກສາ ແລະ ເຂົ້າໃຈຕົນເອງ. ລອງໄປປະຕິບັດເບິ່ງເດີ.